تقبل الله طاعتكموعيدكم مبارك
فارقنا بالأمس شهر جميل كريم...مابين حزن الفراق وفرحه العيد تتوه المشاعر والتفكير...جلست اتذكر الماضي...وأين انا من هذه الإيام في ببعض الأحيان يضيع الأحساس مابين حلم الماضي الجميل وصحوه الحاضر الأليم...جلست اتفكر بعيدنا سابقا...فالعيد هو العيد لم يتغير بل نحن من تغيرنا...فالزمن هو الزمن...لكن الناس هي من تغيرت...في ليله العيد وانا جالس انتظر صلاه الفجر كان الليل طويل ومر علي كأنه عام...فأطلقت العنان للعقل ان يسبح في بحر ذو موج عاصف غاضب من الخيال وما أن قال الله أكبر...حتى رأيت قاربي وهو مكسور من قوه الأمواج المتلاطمه...فبين عيد الأمس وعيد اليوم فروق...فأذكر عيد الأمس كنا نقوم على الصلاه نكشخ بالدشداشه الجديده والنعال الجديد اعزكم الله وطقم البوك والقلم واذكر ايامها كنا بعد الصلاه نذهب مع الوالد لبيت عمي القريب لمنزلنا ونجد الجيران قد تجمعوا صباحا على صحن مجبوس ؟؟عيش ومرق ضرب بالخمس...وكانت عاده جميله تناقلها الأجداد للأبناء...واختفت الآن ولم يحافظ عليها الا من رحم ربي...واتذكر شغفي للذهاب لبيت جدتي رحمها الله...والجلوس بالديوانيه واستقبال المهنئين من الباب من اجل العيديه طبعا...واتذكر المنافسه بين وبين ابناء خالاتي على من جمع اكثر عدد من العيادي...وكنا نختم يومنا بعد العصر بالذهاب لساحه خيطان او احد مرافق المشروعات السياحيه...لصرف العيادي على اللعب وفرحتنا لا يوجد لها مثيل...اما اليوم بعد ان صحيت من سبات الذكريات وذهبت للصلاه وبعد صلاه العيد والخطبتين خرجت انا وام العيال...وعدنا للبيت وما ان وصلت بيتي وعايدت امي...حتى جائتني الخادمه تقولي بابا في رجال بالديوانيه...جائني احساس غريب جميل ابتسامه افتقدتها منذ سنين طويله نزلت ولا جيراني...هنا تذكرت شعور ابي رحمه الله عليه وفرحته بتجمع الجيران لديه او لدى بيت عمي...وبعد السلام والتبريكات...اخذت ابني معي بعد تعب وعناء وتقديم المغريات له...وذهبت لزياره ابناء عمومتي...لكني لم اجد بريق فرحتنا في اعيننا بعيون ابني...فالاخ قاعد بالديوانيه ماسك الآي فون طايحله لعب مو راد على احد...وفي بيت جده لم اجد فيه لهفتنا بأستقبال الضيوف...وتناقشنا بيننا ان هذا نحيس ماعطانا ولا هذا عطاني وماعطاكم...بل وجدت جمود غير طبيعي...وين عيدنا وفرحتنا زمان بعيدنا اليوم...
الله يعيد ذيك الأيام علينا ويدوم علينا المحبه ويتمم علينا فرحه العيد
بتقبل رمضان منا يارب
اللهم امين
رساله لأبن خالي شكرا لك من القلب على مافعلت...وشكرا لك من القلب على ماقلت
هناك 8 تعليقات:
سلام
العيد لأم الدنانديش
صحيح تغيرت الامور للاسوا بركات التكنولوجيا شتات ولا شتات يهود بابل:)
على طاري العيش بصباح الله خير في العارضية القسائم كانوا جيرانا الحضر يسكروون الشارع ويحطون مثل السماط يفرشونه وكل واحد اييب من بيته يامرقوق يالله الجبد ولا البعير
او عيش او او او طبعا القرض الجمعه والتهنئة الجماعيه
في القصيم الى الان مره رحنا ويا مبارك الساير وعمي وشخص من عائلة الشاهين الجلاهمه البحرين يبون يتابعون المزرعه بالزلفي وبعدها لبريده والله موقف حطوا السفره والصحون والطريقه انت تاكل من الصحن الاول بعدين تقوم وتاكل من الصحن الثاني والثالث ةالرابع وووو لووول حنا طبعنا بالصحن الاول مانعرف الطريقه وم الاحترام لازم تمر على الصحون كلها:)
طبع هذه اخر مره نروح بريده بالعيد
عيدك مبارك .. وكل عام وانت بخير :)
كل عام وانت بخير حجي
وعيدك مبارك
العزيز بومبارك (مسمار)
عليكم السلام ورحمه الله وبركاته
وتقبل الله طاعتك وعيدك مبارك
الوضع اللي كنت اشوفه زمان نفس اللي وصفته انت كانو يتجمعون بالدجه اللي عند بيت عمي ويفرشون ويضربون بالخمس وماكانو حضر...هذا دليل ان هالعاده كانت عند الطرفين...واهي اصلا على حسب علمي وانا مو متأكد طلعت من القصيم
كلامك صحيح مئه بالمئه
بس ماقلتلي شسالفتك مع التمر :)
شكرا لمرورك
العزيز ابتسامه
منا ومنك صالح الأعمال
وأيامك سعيده
شكرا لمرورك
ابن العمومه
وخير من يمثلنا بالشبكه الوطنيه عين بغزي
وانت بخير وصحه وسلامه انت والاسره الكريمه امين يارب
وتقبل الله طاعتك
وجودك انت ومسمار بنفس الوقت خلاني اشك انه في فرعيه :)
شكرا لمرورك
لا خلا ولا عدم
kuwaiti_cool
عيدك مبارك وتقبل الله منكم ومنا صالح الأعمال
اتفق معك تماما ان العيد هو العيد ولكن الأوضاع والناس قد تغيرتا
اهم شيء انك توصل الأمور الطيبة والجيدة للأبناء بمعني ان تكون تربيتنا بالقدوة اي نحرص على زيارة ذوي القربى حتى يتعلم منا الصغار
اما سالفة غدا العيد سالفة، اذكر ان الغدا دجاج بعيد الفطر وطبعا لحم بعيد الأضحى يكون الساعة 9 او 10 الصبح، اظن آخر مرة تغدينا فيها هالحزة كانت من عشرات السنين
حاولت ارد هالعادة لكن محد وقف معاي!
عساك من عواده
العزيز ولد الديره
كل عام وانت والأسره الكريمه بألف خير
صحيح ان هذه العاده الجميله يصعب على الجيل الحالي تقبلها
فشباب هالوقت يترقون اول يوم العيد بدين دي لوكا ويحلون بنك بيري
تبيهم يضربون مجابيس من صباح الله خير
ماظن
اصلا زين منهم يلبسون الزي الوطني يوم العيد
اما عن نقل العادات فأنا دقه قديمه احاول ان انقل هذه العادات لأولادي والله يقدرني عليها انشالله
شكرا لمرورك على هالمدونه المتواضعه
واتمنى بالمره القادمه ان سويت مجبوس اول يوم العيد دق على الشياب الدقه القديمه من المدونين يرتزون عندك :)
عساك من عواده
إرسال تعليق